तालिवानले लिटिल मेसीलाई मार्ने धम्कि दिएपछी देश छोडे

35

एजेन्सी – सन् २०१६ मा अफगानिस्तानका एक पाँच बर्षीय बालक मुर्ताजा अहमादीले अर्जेन्टिनाका महान खेलाडी लियोनल मेसीको नाम लेखिएको १० नम्बरको जर्सी लगाएर फुटबल खेलिरहेको फोटो सार्वजनिक भयो ।

सामाजिक सञ्जालमा मुर्ताजाको तस्बिर भाइरल भएपछि उनको नामनै ‘फुच्चे मेस्सी’ राखियो । फुच्चे मेसी उपमा पाएका उनै मुर्ताजालाई अहिले आतंककारी समूह तालिवानले मार्ने धम्की दिएको छ ।

मुर्ताजाको तस्बिरले विश्वभर एकाएक चर्चा पाएपछि मेसी आफैले मुर्ताजालाई कतारको दोहामा भेटेका थिए । बार्सिलोना र कतारको अल अली क्लबबीचको मैत्रीपूर्ण खेल्न आउँदा मुर्ताजालाई भेटेर मेसीले आफ्नो हस्तक्षर सहित अर्जेन्टिनाको जर्सी पनि दिएका थिए ।

मैत्रीपूर्ण खेलको समयमा मुर्ताजा पनि मेसीसँगै मैदानमा छिरेका थिए ।
त्यसपछि मुर्ताजाको परिवार पिडामा पर्यो । मुर्ताजाकी आमा शाफिकले तालिवान लडाकुले छोरालाई लैजाने र मार्ने धम्की दिएका कारण घर छाड्न बाध्य भएको बताएकी छन् । ‘तालिवानले कि पैसा दे नत्र तेरो छोरा दे भन्दै परिवारलाई धम्क्याउन थाल्यो । हामीलाई तर्साइ रहेको छ । मेसीले दिएको पैसा हामीलाई देउ । होइन भने छोरा लैजान्छौं भने । मेसीको पैसाले तिमिहरु धनी बन्ने भनेर धम्क्याई रहे,’ शाफिकले भनेकी छन् ।

तालिवानले मार्ने धम्की दिएपछि ‘फुच्चे मेस्सी’ को परिवारले घर छाडेको छ । सात बर्षीय मुर्ताजाको परिवार यसअघि अफगानिस्तानको दक्षिण पूर्वी गाजिया प्रान्तमा बस्दै आएको थियो । धम्कीपछि राजधानी काबुल बसाई सरेको मुर्ताजाको परिवारलाई त्यहाँपनि तालिवानको पटक पटक धम्की आएपछि अन्यत्र सरेको अन्तर्राष्ट्रिय सञ्चार माध्यामले जनाएका छन् ।

मुर्ताजाको परिवार मात्र होइन, तालिवानको हमला र धम्कीले त्यहाँका अन्य बालबालिका पनि प्रताडित बनेका छन् । पछिल्लो समय तलिवान आतंकवादी समूहका कारण अफगानिस्तानको जनजीवन थप कहाली लाग्दो बनिरहेको छ ।

कमेन्ट गर्नुहोस्
You might also like